Sámi kulturárbbi sajádat globála hástalusain

UNESCO skuvllaid rektorat ja oahpaheaddjit čoagganit nationála konferánsii Áltái 13.9. ja Guovdageidnui 14.9.23. Váldomihttu konferánssa fáttás lea loktet gelbbolašvuođa das mot sámi kulturárbi sáhttá veahkkin čoavdit stuora máilmmiviidosaš hástalusaid omd. dálkkádat ja biras áššiin. Oahpaheaddjit sihke Norgga, Suoma ja Ruoŧa skuvllain háhket eambbo dieđuid eamiálbmogiid vuoigatvuođaid ja servodagaid birra vai buorebut nagodit oahpahit iežaset ohppiid omd sámi áššiid birra.

Sámi Lohkanguovddáža jođiheaddji Karen Inga Eira galgá logaldallat oahppoplánaid sámi sisdoalu birra ja rektor Liv Inger Somby fas logaldallá Duohtavuođa- ja seanadankommišuvnna barggu birra.